A Xunta sitúa a mellora de espazos termais como un revulsivo económico

O sector termal galego consolídase como un motor de desenvolvemento e turismo, grazas ao apoio continuado da Xunta de Galicia. Subliñar a importancia estratéxica do termalismo na dinamización da economía local e a atracción de visitantes. Con este obxectivo, a Consellería de Economía e Industria ten en marcha unha nova convocatoria de subvencións para o ano 2025, co obxectivo de continuar apoiando aos concellos na modernización e mellora dos seus espazos termais de uso lúdico. O programa busca potenciar o atractivo destas instalacións e consolidar a Galicia como un referente nacional e internacional no turismo de saúde e benestar. Trátase da terceira edición da convocatoria, que abriu o pasado día 11 de setembro con carácter plurianual (2025 e 2026) e conta cun orzamento de 750.000 euros.

Un dos aspectos máis relevantes desta nova convocatoria é o seu réxime de concorrencia non competitiva. Isto implica que as solicitudes das entidades locais serán avaliadas e concedidas por estrita orde de presentación, sempre que cumpran con todos os requisitos técnicos e administrativos establecidos. Deste xeito, garántese a axilidade no proceso, pero á vez esíxese aos consistorios unha resposta rápida, xa que as axudas se outorgarán ata esgotar a totalidade do orzamento dispoñible.

Estratexia a longo prazo

O compromiso da Xunta co termalismo non é novo. De feito, Galicia foi pioneira en España coa aprobación da Lei de aproveitamento lúdico de augas termais no ano 2019. Esta normativa pioneira foi fundamental para impulsar un crecemento ordenado e seguro do sector, que experimentou unha notable proliferación de proxectos turísticos nos últimos anos e que agora se ve reforzado coas achegas económicas do Goberno galego. A combinación dun marco lexislativo sólido e un apoio financeiro directo e continuado consolida a posición de Galicia no novo mapa do turismo termal.

Así, o balneario de O Bañiño é un exemplo palpable dos froitos das políticas de apoio do Goberno galego. A instalación resultou beneficiaria das convocatorias de axudas da Consellería de Economía e Industria correspondentes aos anos 2022 e 2023, que permitiron executar proxectos de mellora por un importe duns 300.000 euros, dos cales o 80% foi financiado a través das subvencións.

Grazas ás axudas da convocatoria 2023-2024, esta tempada estival o espazo termal funcionou coas súas instalacións totalmente renovadas. O espazo resultou beneficiario das últimas convocatorias da Consellería de Economía e Industria destinadas a entidades locais para actuacións encamiñadas ao acondicionamento e mellora das instalacións dos espazos termais de uso lúdico da Comunidade autónoma, con apoios que chegan ao 80% do importe das actuacións.

Neste caso concreto, as achegas do Goberno galego permitiron proceder á instalación de drenaxes, peche perimetral e accesos, rampla de acceso adaptada, aseos adaptados, mellora dos vestiarios e instalacións auxiliares, mellora das zonas verdes, instalación de varandas e duchas e acondicionamento dos vasos, equipos de medida do PH, temperatura e turbidez da auga, así como para a dotación de mobiliario urbano, acometida eléctrica e alumeado exterior, acometida de auga e de saneamento e acondicionamento do aparcamento. Posteriormente, executouse o proxecto de humanización e mellora deste espazo coa construción de muros de cachote de granito, o axardinamento exterior do recinto e a plantación de céspede, rampla para persoas con discapacidade e mellora das instalacións de aseos e vestiarios para adaptalos á normativa de accesibilidade, instalación da sinaléctica e acondicionamento da contorna e saída das augas termais.

Modernización e mellora das infraestructuras termais

Outro exemplo de mellora dos espazos termais de uso lúdico é o de Teáns no municipio pontevedrés de Salvaterra de Miño, que alberga as termas ao aire libre máis grandes de toda a Comunidade autónoma e que foi perceptor das axudas do Goberno galego para levar a cabo actuacións encamiñadas ao acondicionamento e mellora de instalacións termais. Neste marco, a Xunta acaba de poñer en marcha esta terceira edición dun programa de axudas ao que se destina unha partida de 750.000 euros e cuxo prazo de solicitude está aínda aberto. O obxectivo é ir, pouco a pouco, ofrecéndolle ós municipios a posibilidade de que vaian modernizando e mellorando as infraestruturas termais, así como fomentar a actividade termal mediante a realización de actuacións dirixidas ao acondicionamento deste tipo de instalacións.