O magosto de Cualedro terá pandereteiras e un concurso de bicas

O magosto cualedrés terá lugar unha vez máis no recinto do CEIP Vicente Risco, e dará inicio ás 14,30 horas. O menú estará composto por empanada, costela, chourizo, criollo e panceta, e ao remate non faltarán nin as castañas, nin a bica nin tampouco o licor.

A bica será unha das protagonistas da xornada, xa que terá lugar un concurso de elaboración das mesmas con trofeos para os gañadores e tódolos participantes.

O magosto contará coa amenización musical de catro agrupacións de pandereteiras: as Xironda, de Montes, “As Ferreñas do Toural” e “As Xeitosiñas” de Baltar.

Últimos días para as entradas

Este mércores é o último día para adquirir as entradas, a 5 euros, nos bares da vila e na gasoliñeira, mentres que é gratuíto para os cativos ata 12 anos. Organiza o Concello e a asociación de mulleres rurais “As Trabes”, e colabora a Deputación.