Podcast UVigo | Xornadas de Portas Abertas do Centro de Investigación Mariña

Un ano máis, o Centro de Investigación Mariña da Universidade de Vigo (CIM) convida á cidadanía a coñecer de preto a ciencia mariña que se desenvolve nos seus laboratorios a través das Xornadas de Portas Abertas que teñen lugar 8 e 9 de novembro na zona de A Laxe de Vigo. O seu director, Daniel Rey, explica en que consisten.

O obxectivo desta iniciativa é achegar o traballo do persoal investigador a persoas de todas as idades dun xeito lúdico, creativo e de acceso libre. Co apoio da Xunta de Galicia e a Unión Europea a través do Fondo Europeo de Desenvolvemento Rexional, o CIM deseñou un programa que inclúe unha feira científica no centro comercial A Laxe, visitas guiadas ao observatorio Nautilus, un xogo interactivo e un escape room virtual o venres e un paseo en barco e visita á Estación de Ciencias Mariñas de Toralla (Ecimat) o sábado.

Con estas Xornadas de Portas Abertas, o CIM reforza o seu compromiso coa divulgación científica e a educación ambiental, promovendo o coñecemento e a concienciación sobre a importancia dos océanos e a sustentabilidade. Ao dar visibilidade ao traballo que realiza o seu persoal investigador, o CIM espera tamén inspirar ás novas xeracións e crear futuras vocacións científicas.