Castrelo do Val consolida o seu Maragato nun fermoso sábado

Aínda non eran as 16:00 horas, pero diante do Concello castrelao concentrábanse máis dun centenar de persoas que agardaban por este novo Sábado Maragato, síntoma de que este Entroido recuperado vai gañando adeptos. O seu nome fai referencia a unha das figuras típicas da vila e un dos seus principais protagonistas, que estivo presente en todo momento.

A lectura do pregón correspondoulle ao enxeñeiro agrícola Pepe Paz, que nun discurso cheo de retranca definiu o Maragato como “integrador”, e aplaudiu o esforzo de Concello e moitas personas por revivir unha celebración “case esquecida das mentes das nosas xentes”. Ao remate deulle paso o “Rei Mariano, primeiro e imperecedeiro”, o actual Rei de Castrelo que cumpre tres anos de reinado.

A continuación tivo lugar un multitudinario desfile, encabezado pola Mascarada local, e coa presenza das Madamas de Vilar, do Entroido de Campos, de peliqueiros e cigarróns, do Entroido de Matamá, de Vellarróns do Riós, entre outros traxes da contorna e localidades veciñas, todos xuntos e orgullosos do seu patrimonio.

Amenizados polos Bombeiros de Vences e o folión de Vilariño de Conso, percorreron os bares de Castrelo ata a súa chegada ao Terrón, onde desfrutaron dun pincho colectivo e da orquestra El Tattoo, nun novo sábado para o recordo.