Electrocutados cinco integrantes dunha familia cando movían un barco en Ares

Os cinco integrantes dunha familia, un matrimonio e o seu tres fillos, resultaron electrocutados sobre as 21,00 horas deste xoves, 29 de agosto, cando transportaba un catamarán lixeiro desde o aparcadoiro da praia de Seselle, en Ares (A Coruña), cara a unha vivenda unifamiliar situada neste mesmo lugar.

A descarga eléctrica produciuse cando o mastro da embarcación tocou cun cable de media tensión. Ao lugar do suceso desprazáronse catro ambulancias do 061, ademais de persoal sanitario dos Puntos de Atención Continuada (PAC) de Fene e Ferrol.

En concreto, informaron fontes sanitarias a Europa Press, o 061 enviou dúas ambulancias medicalizadas e dúas asistenciais, así como equipos sanitarios de Fene e Ferrol que procederon a realizar manobras de reanimación cardiopulmonar a dous menores e un mozo de 18 anos.

Todos os feridos foron trasladados ao Hospital Arquitecto Marcide, onde quedaron ingresados na Unidade de Coidados Intensivos (UCI) os fillos do matrimonio, de 12, 16 e 18 anos, mentres que as feridas dos proxenitores eran menores.

Ao lugar do incidente acudiron, así mesmo, efectivos da Policía Local e de Protección Civil de Ares, ademais de axentes da Guardia Civil.

Tamén foi necesario cortar a subministración eléctrica para poder liberar o cable da embarcación, polo que se rexistraron cortes de fluído na zona.