A Xunta atribúese o mérito de ter posto freo a caída do galego

O secretario xeral de Política Lingüística, Valentín García, asegurou que a enquisa do Instituto Galego de Estatística (IGE) que alerta dun descenso do uso do galego analiza "os últimos dez anos", nos que a caída do número de galego falantes na franxa de idade de entre cinco e 15 anos pasou de ser "de doce puntos" no primeiro quinquenio a situarse en "dous puntos" nos últimos anos, feito "positivo" que atribuíu ao labor do Goberno do PPdeG. "Está claro que os datos desta enquisa preocúpannos a todos, pero a noticia tamén pode ser que se frea a caída de falantes en galego" defendeu Valentín García este venres durante a súa comparecencia na Comisión de Educación do Parlamento galego, ao ser cuestionado pola deputada do BNG Ana Pontón sobre a situación do idioma galego e o cumprimento do Plan de Normalización Lingüística.

"Unha case sente ganas de chorar escoitando as súas declaracións e vendo o seu exercicio político", lamentou Ana Pontón, quen censurou que o secretario xeral acuda á Cámara a "dicir que a situación está mellor e a culpar ao bipartito", cando no estudio se advirte de que "hai unha perda alarmante de galego falantes".

Deste modo, a parlamentaria nacionalista argumentou que os datos reais "son outros" e puxo como exemplo que, "no ano 2008, o 14,3% dos estudantes afirmaban recibir todas as clases en galego", mentres que en 2013 este feito "caeu ao 2,15%". Ao respecto, tamén rexeitou que o retroceso no uso do idioma galego "sexa un problema das familias", ao asegurar que "se segue discriminando dende o punto de vista legal e social" ás persoas que o empregan, coa agravante de que a Xunta "promove a súa desaparición" en todos os ámbitos".

Esta cuestión foi negada polo responsable de Política Lingüística, que destacou que "o sistema educativo" cumpre o seu labor de normalizar e potenciar o uso do galego en todos os ámbitos como, ao seu xuízo, se observa no feito de que a porcentaxe de persoas que aseguran falar pouco ou nada "baixa entre os alumnos que máis anos de escolarización teñen".

O debate sobre o uso do galego protagonizou varias das restantes preguntas formuladas na comisión. Así, antes de cuestionar ao Goberno galego sobre as medidas que leva a cabo para impedir o "desmantelamento" do sector da dobraxe, o deputado socialista Francisco Caamaño censurou a estratexia do presidente da Xunta, Alberto Núñez Feijóo, de "reducir o galego ata que quede en cousa duns poucos". "O suposto aumento dos que só falan en galego, en realidade, esconde un fracaso do goberno na defensa da cultura e da lingua galega, xa que o número total de persoas que falan en galego, aínda que tamén falen en castelán, diminúe", advertiu.

dobraxe na tvg

Tras iso, criticou que, mentres o presuposto da TVG "descendeu nun 19 por cento nos últimos tres anos, as partidas destinadas ao sector da dobraxe caeron nun 23%". "O caso deste sector resulta máis dramático porque, ademais, hai unha caída na execución dos presupostos", denunciou.

Pola súa banda, o secretario xeral de Política Lingüística vinculou estes datos á "situación do mercado existente" á que, na súa opinión, "tense que axustar" o sector despois de que nos últimos anos "se experimentase un cambio de tendencia". Así, asegurou que cada ano "aumenta o interese do público" cara á "produción propia" como detallan os datos sobre a audiencia da Televisión de Galicia que, tal e como indicou, é unha das "televisións autonómicas máis vistas" e desempeña "un papel fundamental na promoción do galego, que mete en todos os fogares".