Fillas de Cassandra: unha catarse colectiva

"Últimas dionisíacas” chámase o novo directo de Fillas de Cassandra, “un convite ao festexo colectivo e catártico” co que percorrerán primeiro Galicia e despois España o dúo que integran María SOA e Sara Faro.

Logo de derrubar a “Acrópole” e subir aos altares das grandes salas de concertos e festivais do país coas súas letras directas e a forte conexión co público, Fillas de Cassandra bota unha última ollada á polis. Este 2024 o dúo regresa cun novo directo, “Últimas Dionisíacas”, unha proposta na que brillan a mestura entre o tradicional, o pop e o techno ten un efecto catártico.

Con Vigo como puntapié inicial e o Auditorio Mar de Vigo o 16 de febrero como primeiro escenario dunha intensa e extensa xira, Fillas de Cassandra ofrece unha nova proposta escénica e musical, na que fará unha relectura dos temas máis recoñecidos do seu primero LP, “Acrópole”, desde unha electrónica máis escura e potente; ademais de recuperar algúns dos sinxelos publicados nos últimos meses e avanzar outros inéditos para o público.

“Últimas Dionisíacas’ é un espectáculo que aposta polo inédito, que existe só no aquí e agora do directo, sen chegar a reproducirse nunca. Cantos efímeros, revisitacións da ‘Acrópole’ e parte do que ha de ser o noso próximo traballo discográfico convive nunha única escena atravesada pola luz, a escenografía e moito do indesvelable”, explica o dúo.

Así, neste novo directo, concibido por Sara e María como un “festexo colectivo e catártico, que só pode acontecer na convivencia entre o público e o palco”, a luz e a escenografía terán un papel moi relevante. Ademais, entre as novidades da proposta, o dúo estará acompañado doutras dúas músicas, Tania Caamaño e Marina Vidal, apostando así pola organicidade do piano, o bombo legüero, as pandeiretas, os pandeiros, violín ou as harmonías vocais en rigoroso directo, mais sen esquecer as bases electrónicas producidas por María SOA e Berto.

A promesa da música galega conságrase, deste xieto, cunha proposta de calidade artística e escénica onde a luz e a escenografía veñen sumarse aos xa recoñecidos puntos chave do seu éxito: a forte presencia e conexión co público, as súas letras directas e emotivas e a súa sonoridade na que volven a demostrar que a mestura entre o tradicional, o pop e o techno teñen un efecto único.

Os sinxelos publicados ao longo do ano pasado, como “Tola”, “Taratavoa” (con Galician Army) e “Canta miña sombra”; oficiarán como adiantos do que virá no actual ano 2024 de parte de Fillas de Cassandra.