Un cocido multitudinario foi o anticipo do gran folión en Laza

Para ir abrindo boca, este venres tivo lugar o derradeiro Venres de Folión, onde os chocos, os bombos e os fachóns volveron percorrer as rúas. Este gran folión non decepcionou, tanto pola participación como polo ambiente entroideiro que se respirou.

Durante a tarde houbo xa pasarrúas co grupo tradicional Tanto Nos Ten, que se estivo desprazando entre Laza, Souteliño e Cimadevila. Posteriormente, de cara a cargar pilas para o folión, celebrouse a xa tradicional Cea do Cocido, que reuniu baixo unha gran carpa instalada na entrada da vila a arredor de 300 persoas que desfrutaron dunha magnífica paparota.

Este Sábado arrancan as Cabritadas, con pasarrúas con fariñada dende as 16,00 horas co grupo Tanto Nos Ten. Ás 20,00 horas haberá música a cargo de LouBand, e pola noite, cea dos mozos en pandillas e verbena con Grupo 3.com a partir das 00,30 horas.