A II “Ruarada” enche a vila de Laza coa música e cultura popular das mulleres

OBRADOIROS E CONCERTOS

Laza acolleu este sábado a “Ruarada na das Guerras”, a súa segunda “ruarada”, un evento cultural e musical que celebrou unha serie de actividades que se estenderon ao longo de toda a tarde

Coloquio da Lucía Cedrón sobre a Dorothé Schubarth na II “Ruarada na das Guerras”. | A.C. enLAZAdos

O potente tecido asociativo lazao, exemplificado nas asociacións culturais enLAZAdos e as Silveiras do Támega, foi quen de atraer a diferentes expoñentes da escena musical do país, reafirmando á pequena vila como un referente cultural galego.

Decenas de asistentes desfrutaron nun local habilitado para a ocasión da primeira parte da tarde, que iniciou cunha ponencia da Lucía Cedrón sobre a musicóloga suíza Dorothé Schubarth, coincidindo co ano en que as Letras Galegas se adicaron as cantareiras. No mesmo espazo tivo lugar a continuación un obradoiro de culleres, impartido por Isabel Cid.

As Netas do Arnoia foron un dos grupos convidados. | A.C. enLAZAdos

A continuación a xornada trasladouse á rúa, onde se sucederon as actuacións, co acento posto no son de raíz e nas mulleres. Primeiro foi o turno do grupo tradicional Netas do Arnoia, nado no seo da escola de música tradicional de Baños de Molgas. Tras elas tomaron o relevo Os Biruxes, de Astureses, en Boborás, un grupo de romaría con 13 anos ás súas costas.