Manzaneda celebrará os 50 anos do seu colexio

O CEIP de Manzaneda está de aniversario. Este ano 2025 cúmprense cincuenta anos desde a súa apertura, medio século de historia educativa que será celebrado este sábado 10 de maio cunha gran festa nas propias instalacións do centro. A cita quere reunir antigas e novas xeracións arredor dun proxecto común: o colexio que marcou a vida de moitos veciños e veciñas non só do municipio, senón de pobos de concellos limítrofes.

A celebración nace como peche dun curso no que o centro puxo en marcha distintas iniciativas para conmemorar esta efeméride. Baixo o lema “Eu fun ao cole a Manzaneda e sobrevivín”, promovéronse campañas de venda de camisetas e bolsas conmemorativas co obxectivo de recadar fondos para organizar os actos do aniversario.

A festa dará comezo ás 10,30 da mañá coa apertura do colexio e a recepción de autoridades, e continuará cun programa cheo de actividades para todos os públicos. A música será protagonista con actuacións do alumnado actual, ademais de teatro e versos recitados por parte de antigos alumnos. A xornada tamén contará cunha sorpresa musical dos irmáns Gutier e Javier Álvarez, exalumnos do centro e coñecidos pola súa traxectoria musical.

A partir das 14,00 horas, haberá comida compartida e sorteo, e xa pola tarde, ás 17,30, será a quenda do concerto de “Uxía lambona”. A festa rematará pola noite cun guateque organizado en colaboración coa ANPA, previsto para as 20,00 horas. O xantar será no pavillón e os concertos na pista das piscinas.

Desde o centro escolar destacan que se trata dunha xornada moi especial: “Temos moito que celebrar, e se chove... que chova!”, reza o cartel que anuncia o evento. Medio século de aprendizaxes, amizade e comunidade que este sábado volverán a encher os corredores do colexio de vida, xuntando netos, pais e avós como alumnos.

As entradas, cun prezo entre 25 euros a partir dos 12 anos e 10 euros para os menores desa idade. Os tickets están á venda nos establecementos da vila.