Albarellos acollerá o 4 outubro os eventos adiados polos lumes en Monterrei

A alameda de Albarellos, ubicada ao carón da Casa consistorial de Monterrei, acollerá finalmente o vindeiro 4 de outubro, sábado, os dous eventos que tiveron que ser aprazados pola vaga de lumes que no mes de agosto afectou a tódolos núcleos de poboación da vila: tanto a XL Xuntanza Internacional de Gaiteiros como a IV Festa da Vendima terán lugar nesa xornada.

Así mesmo, ao longo deste mes de setembro e a primeira parte de outubro, o punto de información de Turismo Monterrei atópase emprazada na Viña do Conde, xunto ao cruceiro de Monterrei, ao pé da entrada ao conxunto monumental da acrópole máis grande de Galicia. Os visitantes poderán seguir acudindo a el para obter información do castelo, da comarca e da provincia.

Dende o mes de abril a actividade da oficina de turismo de Monterrei vénse prestando en puntos exteriores ao castelo de Monterrei por mor das obras de rehabilitación do conxunto fortificado. Neste tempo ten pasado polo parador de Verín ou a casa consistorial.

Horarios e explicacións

O servizo de información turística de Monterrei atende a visitantes e peregrinos todolos días da semana, en horario de 10,30 a 14,00 e de 16,30 a 19,00 horas. Ademais, as explicacións históricas continúanse a prestar baixo reserva, en turismomonterrei@gmail.com ou no teléfono 988 361 360.