O BNG de Monterrei pide un motor de reposto en Medeiros e melloras nun centro social

O BNG en Monterrei, a través do seu voceiro, Alberto Rodríguez, vén de presentar dous escritos no Concello. O primeiro é relativo aos cortes de auga en Medeiros, que este mes quedou sen auga “máis de catro días, algo intolerable”, polo que pide un “esforzo” co fin de adquirir un “motor de agua de reposto cando as circunstancias o esixan”.

No segundo escrito, o concelleiro da forza nacionalista alerta do “mal estado” do centro social/tanatorio da Madanela, froito dunha obra “sen rematar”, polo que solicita “unha solución á situación”, así como a habilitación de “dous aseos”.

“Desculpas á veciñanza”

O alcalde, José Luis Suárez, afirma que en Medeiros produciuse unha “avaría nas turbinas das bombas, cambiadas hai pouco”. Ante un “cúmulo de situacións” estívose “día e noite traballando no arranxo”, e malia levar unha “cisterna” á veciñanza, pídelle “desculpas”.

Sobre o local social da Madanela, asegura que “precisa melloras, solucionarémolas cunha achega de 48.000 euros de Agader”.