Luar na Lubre, broche á maridaxe de viño e gaitas do novo "Monterrei Reverdece"

Tralos difíciles momentos vividos na comarca, o Concello de Monterrei quere transmitir unha mensaxe de agradecemento e de posta en valor de tódalas persoas que colaboraron na extinción dos lumes.

Con ese obxectivo, o vindeiro 4 de outubro celebrarase o festival “Monterrei Reverdece”, que combinará ese sábado as os eventos adiados: a IV Festa da Vendima e a XL Xuntanza Internacional de Gaiteiros. Como broche de ouro á xornada, que terá lugar integramente na alameda de Albarellos, haberá unha actuación do mítico grupo folk galego Luar na Lubre.

A Festa da Vendima volverá render homenaxe ao viño da D.O. Monterrei e ao traballo dos viticultores locais. Dará comezo ás 11,30 horas coa saída do Folión de carros, acompañada por grupos locais e lusos que farán paradas no percorrido.

Ás 12,00 horas darase por inaugurada a festa co pisado das uvas, tralo que haberá foliada aberta ata as 14,00 horas, cando comezarán as actuacións musicais d’A Roda e de Coanhadeira que ata as 17,00 amosarán o seu repertorio de música tradicional galega.

No recinto haberá postos para desfrutar de porco ao espeto, gastronomía local e dos viños da D.O. Ademais haberá animación infantil e obradoiros de Artesanía de Galicia, para o os máis cativos.

Gaiteiros de toda Europa

A Xuntanza Internacional de Gaiteiros, festa de interese turístico e cultural, arrancará ás 17,00 horas con artistas internacionais, da República Checa, Bélxica, Escocia ou Portugal, e doutros lugares do Estado como Asturias ou País Vasco, xunto a grupos de gaiteiros da comarca e de Galicia. Como colofón, ás 22,00 horas o grupo Luar na Lubre ofrecerán un concerto.