“Movéndonos polos pobos”, Oímbra ofrece aquazumba e zumba a toda a veciñanza

CLASES GRATUÍTAS

Un verán máis, Oímbra ofrece clases de balde de aquazumba nas piscinas municipais e agora suma tamén de zumba, que percorrerán os núcleos

As piscinas municipais de Oímbra albergarán un ano máis as exitosas clases de aquazumba. | Concello de Oímbra

O Concello de Oímbra vén de anunciar o programa de actividades físicas e de benestar “Movéndonos polos pobos”, que percorrerá os núcleos do municipio ofrecendo clases de zumba de forma gratuíta a partir da semana que vén.

Desta forma, a veciñanza de Casas dos Montes será a primeira en desfrutar destas aulas, o martes 15, seguidos por Bousés, o xoves 17, A Granxa, o luns 21, Videferre, o mércores 23, Oímbra, o martes 29 e As Chás, o xoves 31.

Tralas quendas de xullo, en agosto será o turno do Rosal, o luns 4, San Cibrao, o mércores 6, Rabal, o martes 12 e Espiño, o xoves 14. Tódalas clases terán lugar de 21,00 a 22,00 horas, nas prazas de cada un dos núcleos de poboación.

Aquazumba un ano máis

Como complemento ás aulas de zumba, o Concello oimbrao retoma un verán máis as clases de aquazumba para tódalas idades nas piscinas municipais da vila.

Estas formacións, que unen exercicio e diversión, teñen previsto impartirse os días 19 de xullo, sábado, 24 de xullo, xovesm e 2 de agosto, sábado, de 18,00 a 19,00 horas.