O “Camaleón” comeza a súa instalación no Campus Auga

O novo edificio do campus de Ourense comeza a tomar forma co perimetrado da súa contorna. A escola de Aeronáutica, coñecida como “Camaleón”, empeza a ser unha realidade. A empresa Gómez Crespo, adxudicataria do concurso público, empezou a adecentar o que será a contorna da nova construción co valado para empezar a preparar os terreos. A compañía ourensá recibiu no concurso un total de 97,11 puntos, situándose por diante das cinco empresas que concursaron por levantar a nova sede dos estudos de Enxeñaría Aeronáutica e do Espazo, cun orzamento superior ós nove millóns de euros.

Situado a carón da escola infantil do campus, a súa instalación consideráse “unha necesidade para os estudantes do grao de enxeñería”, sinalan dende a Universidade de Vigo, que lembran tamén que o grao de Aeronáutica é un dos que ten maior demanda de prazas.

Deseñado por Javier e Carlos Rodríguez Alcoba, de García Rodríguez Alcoba Oficina de Arquitectura, situada en Madrid, o edificio “non só responde a un programa funcional, senón que achega outra serie de elementos estéticos e de relación co resto das edificacións da súa contorna”, manifestaban os arquitectos no momento de presentar a súa candidatura. A esta intención engadían que “servirá de transición entre a trama urbana edificada e o espazo natural”, aproveitando o desnivel para crear unha serie de terrazas verdes que sirva tamén como lugar de ocio para os peóns.

O proxecto anunciouse como gañador en xullo de 2023 e, despois dunha primeira adxudicación fallida, saíu adiante a adxudicación a Gómez Crespo a comezos de xullo deste mes.