Galiciencia premia os proxectos máis destacados sobre neurociencia

Galiciencia, a maior feira científica que se celebra na comunidade, clausurou a edición do seu 20 aniversario, baixo o lema “Neurociencia e saúde mental”. Así, a Tecnópole acolleu a entrega de premios aos mellores proxectos presentados ao longo dos tres días que durou o evento. Neste senso, Marta Lama, do IES Rosalía de Castro de Santiago, levou o primeiro premio desta edición pola súa proposta “Mente activa”, onde propuxo unha caixa de xogos para persoas con enfermidades neurodexenerativas, como Alzhéimer e Párkinson, que presentan un deterioro cognitivo leve.

O segundo equipo clasificado foi o formado por Daniel Díaz e Carlos Fernández, do CPR Divino Maestro de Ourense, que deseñaron “SaudApp”, unha solución dixital sinxela e eficaz para que calquera persoa poida coidar a súa saúde mental. Mentres, o terceiro premio foi para o proxecto de Eila Lago e Daniela García, do Colexio María Auxiliadora Salesianos de Vigo, centrado na transformación de papel reciclado, materia orgánica, cinza e outros refugallos nun biocombustible eficiente e sustentable, denominado termoecobriks de biomasa.

No acto de entrega participou a conselleira de Economía e Industria, María Jesús Lorenzana. Estivo acompañada da alcaldesa de San Cibrao das Viñas e vicepresidenta da Deputación de Ourense, Marta Novoa; o delegado territorial da Xunta de Galicia, Manuel Pardo; o director xeral de Planificación Enerxética e Minas, Pablo Fernández; o vicerreitor do Campus de Ourense da Universidade de Vigo, Javier Rodríguez; o secretario da Confederación de Empresarios de Ourense, Jaime Pereira; a directora do Centro Galego da Innovación da Formación Profesional, María Jesús Carnero.

Ademais, durante o evento houbo un convidado moi especial, que se conectou coa rapazada por videoconferencia: o ourensán Carlos Nieto, primeiro gañador de Galiciencia -en 2006-, que na actualidade traballa como neurocientífico en Moscú. Finalmente anunciouse o tema de Galiciencia para o ano que ven: a ciberseguridade.