Aberto o prazo de participación para o premio Freire Carril

A asociación cultural Agromadas vén de convocar unha nova edición do premio Freire Carril. Un galardón que dende 2009 ten como obxectivo salientar a aquelas persoas e entidades que traballan polo ben común desenvolvendo actividades de todo tipo en favor da comunidade social, da cultura en xeral e da cultura galega e o idioma de Galicia en particular.

Cun recoñecemento meramente simbólico e sen dotación económica, este premio permite a todos os socios da asociación, así como a calquera entidade asociativa ou cidadá a título particular, propor candidatos que se consideren merecedores de tal gratitude. As propostas poderán presentarse ata o vindeiro 15 de maio, cando pecharán o prazo para dar paso á labor do xurado. Cada entidade ou participante a título individual, só poderá enviar unha única proposta, e terá que facelo acompañado dunha argumentación que facilite o traballo de quen vai proclamar ao gañador. Entre as propostas presentadas, o xurado dará a coñecer o resultado, que se traducirá na entrega dun diploma acreditativo e unha figura con inscrición para o galardoado.

Maximino Cid Ferro polo seu compromiso na vida social e deportiva en Seixalbo no ano 2009; a asociación Amigos da Terra, no eido da vida sostible acorde coa natureza, ou -o máis recente- Felipe Senén López no marco do eido cultural galego, no ano 2024, foron algúns dos nomes que se fixeron co premio Freire Carril.