Ourense estende a presenza da matrona, profesinal clave no coidado da muller

A Área Sanitaria de Ourense, Verín e Valdeorras súmase ao Día Internacional da Matrona e aposta polo seu papel como referente no coidado da muller, estendendo a súa presenza no Hospital Público de Verín e na planta de obstetricia do Hospital Universitario de Ourense, para potenciar a lactación materna e os coidados postparto en coordinación co persoal deste servizo.

A Área Sanitaria de Ourense conta con corenta e unha enfermeiras especialistas en obstetricia e xinecoloxía presentes en todos os niveis asistenciais. Catorce en Atención Primaria e vintesete en hospitalaria, en concreto, catorce no Hospital Universitario de Ourense, sete no Hospital Público de Valdeorras e seis no de Verín.

Presenza en toda a provincia

As matronas de Ourense desempeñan un papel clave nos centros de saúde. Con catorce profesionais adscritas aos distintos Servizos de Atención Primaria estas profesionais contan cunha ampla carteira de servizos integrados no Programa da Muller, que inclúe o seguemento do embarazo de baixo risco, a formación pre e post parto, a educación maternal, a atención integral á saúde sexual e reprodutiva e a menopausa.

Ademais, as matronas de atención primaria son tamén parte esencial do funcionamento a do Cribado de Cancro de Cérvix, posto en marcha recentemente pola Dirección de Saúde Pública da Consellería de Sanidade. Papel que non é novo para as especialistas que xa desenvolvían unha labor de prevención deste cancro feminino.

Ao igual que no conxunto de atención primaria, as matronas manteñen unha actividade de iniciativas de saúde comunitaria, como nos obradoiros de menopausa de Valle Inclán, de Seguridade Vial en Ribadavia, de chan pélvico en Ribadavia e Celanova, ou de educación afectivo sexual en diferentes institutos por parte das profesionais de O Couto, Ribadavia e Celanova.