A creación colectiva centra unha intensa xornada da MIT de Ribadavia

Acreación colectiva marcou a xornada deste mércores na MIT de Ribadavia, centrada na recuperación da memoria e a reflexión sobre a identidade e o territorio, con actividades como obradoiros, mostras abertas e espectáculos que puxeron en valor a forza do teatro como ferramenta social e artística.

A xornada comezou co Obradoiro de Máscara Neutra da compañía Mar Navarro, continuando co Laboratorio “Pan, nubes e chocolate”, do colectivo A Volátil, que culminou cunha mostra aberta ao público.

A artista portugUesa Patricia Portela presentou tamén unha mostra aberta do obradoiro “Os Passadores”, unha creación transfronteiriza que xorde de historias reais de contrabando e exilio entre Galicia e Portugal,

O Auditorio Rubén García do Castelo acolleu como colofón o espectáculo “Reconversión” de Ibuprofeno Teatro, unha proposta de gran formato que mestura teatro e música en directo para abordar, desde a memoria íntima e política, a reconversión naval na Ría de Vigo e as loitas obreiras dos anos 70 e 80. Dirixida por Santiago Cortegoso, a función puxo en escea a oito actores-músicos, que renderon unha homenaxe á xeración que viviu a transformación industrial e social do país.

Premio Abrente

Etse xoves a MIT abrirá cun obradoiro de clown impartido por Roi Borrallas. Ás 19,00 horas, a Igrexa da Madalena acollerá a celebración dos 20 anos do Premio Abrente, un espazo de recoñecemento e reflexión sobre dúas décadas de impulso á dramaturxia galega contemporánea.

A programación continuará ás 21,00 horas na rúa de Santo André coa representación de “HIT (out)”, da compañía Parini Secondo, pechando a xornada con“Crátera”, da compañía portuguesa Circolando / CRL - Central Elétrica, ás 23,00 horas, no Auditorio do Castelo.