Ribadavia ofrece descontos e talleres nas Letras Galegas

Ribadavia conmemora o Día das Letras Galegas cunha programación diversa, comprometida coa cultura galega, e con actividades que promoven a lingua, a música tradicional e o comercio local.

A programación incluirá actividades musicais, obradoiros e exposicións, dando protagonismo ás cantareiras, ás que se lles rende homenaxe nesta edición das Letras Galegas.

Unha das iniciativas destacadas é a encamiñada a incentivar a lectura en lingua galega e apoio ao comercio local, ofrecendo un desconto dun 20% en libros nas librarías da vila polas compras realizadas ata o 17 de maio, unha rebaixa cuxo custo asumirá o Concello.

O día 17 a programación inclúe un obradoiro intensivo de pandeireta, que se impartirá en horario de mañá e tarde no antigo colexio da Alameda; unha actividade é gratuíta, aberta a todas as idades e niveis.

A esta proposta súmase a exposición “Canta que cadramos ben”, que se pode visitar na Biblioteca Municipal de Ribadavia. Trátase dunha mostra e unha unidade didáctica promovida pola Secretaría Xeral da Lingua da Xunta de Galicia, co fin de achegar á cidadanía o legado das cantareiras e da literatura popular oral. Esta exposición, elaborada polo IES Castelao de Vigo, foi premiada no Concurso das Letras Galegas 2025 na categoría de secundaria, bacharelato, FP e ensinanzas de réxime especial.

Feira Revive

Na fin de semana Ribadavia acollerá ademais a Feira Revive do Ribeiro, un evento de suprareciclaxe e consumo consciente, que terá lugar os días 17 e 18 de maio na Igrexa da Madalena, con exposicións, charlas, obradoiros de reciclaxe e actuacións musicais.

Nesta cuarta edición, a feira incorpora tamén actividades vinculadas á conmemoración das Letras Galegas. Así, o sábado 17, ás 12.30 horas, terá lugar a actuación das Pandereteiras da Istoria. Pola tarde realizaráse un obradoiro de construción dun pandeiro vegano impartido por Troula Instrumentos, a partir das 17,00 horas, mentres que ás 19,30 horas o DJ Chemigal ofrecerá unha sesión con música exclusivamente de artistas galegos.