Castrelos de Cima, no Riós, 52 anos conxurando a súa gran queimada

FEITICEIRAS E MEIGAS

A parroquia de Castrelos de Cima prepárase para a LII edición da Gran Queimada, na que este núcleo do Riós ofrece sempre un espectáculo festivo cheo de mitoloxía galega e augardente

Preparación da gran queimada de Castrelos de Cima (Riós) na súa 50º edición. | Asociación cultural Os Queimas

A parroquia de Santa María de Castrelos de Cima, no concello do Riós, que recentemente estreou nova toponimia, celebra este vindeiro 9 de setembro á medianoite a 52º edición da súa tradicional gran queimada, no marco das festas patronais na honra da Virxe dos Remedios.

Esta celebración está organizada pola asociación cultural Os Queimas, que ao longo do ano dinamiza a aldea con todo tipo de actividades culturais e de ocio que manteñen unida á veciñanza.

Ademais, buscan o recoñecemento da súa gran tradición como Festa de Interese Turístico de Galicia, apoiándose no feito de ser a “queimada popular máis antiga de Galicia”. Co respaldo do Concello, remitirá a solicitude a Turismo nestes meses.

Aos persoeiros da mitoloxía galega —a Santa Compaña, feiticeiras e meigas— uniranse os disfraces da temática deste ano, a reivindicación a prol dun tren útil, coa colaboración da plataforma Dereito ao Tren.

As festas en Castrelos de Cima arrancan o domingo, 7 de setembro, cun pasarrúas e verbena a cargo da charanga Europa. Ao día seguinte, o pasarrúas estará protagonizada pola charanga Va K Pinta. Á 13,00 horas haberá misa con amenización, e na sesión de tarde-noite actuará o grupo Xoldra. Pechará a velada a discomóbil Electro Show.

Día grande

O día grande será o martes 9, que iniciará cun pasarrúas co grupo de gaitas do Riós. Ao mediodía, misa con procesión, e á tarde, a ruada tradicional. Pola noite, verbena coa orquestra Alma Latina e discomóbil Electro Show. Tocará agardar ata as 02,00 horas do mércores para vivir a LII Gran Queimada.