A colaboración coa Deputación, clave nos núcleos do Riós

PLAN COOPEROU

O Concello do Riós continúa avanzando na mellora da mobilidade nos seus núcleos grazas á colaboración institucional coa Deputación

Obras de pavimentación nas rúas da Veiguiña -esq.- e de Dómez -dta.-.

Froito desta cooperación, no Riós executáronse recentemente dúas actuacións importantes de renovación do pavimento nos lugares da Veiguiña, Dómez e Valfarto, na parroquia de Trasestrada, e en Covelas, na parroquia de Castrelos de Cima.

Na Veiguiña, os traballos de mellora do firme permitiron dotar a contorna de viarios máis cómodos, seguros e esteticamente coidados, facilitando o tránsito de vehículos e veciñanza.

Esta actuación, financiada integramente pola Deputación, responde á estratexia conxunta de apoio aos pequenos municipios no seu desenvolvemento e na modernización das infraestruturas básicas.

Pola súa banda, en Dómez completouse a segunda fase das obras de mellora das súas rúas, tamén cun 100 % de financiamento por parte do organismo provincial.

O pavimento totalmente renovado reforza a accesibilidade, embelece o espazo público e afianza o compromiso do Concello coa transformación progresiva do seu territorio.

A rexeneración dos firmes de Covelas e Valfarto forma parte do mesmo proxecto, financiado a través do Plan CooperOU da Deputación con 48.000 euros.

“Transformar o territorio”

A alcaldesa, Eva Barrio, asegura que “estamos a transformar o noso territorio, paso a paso, cunha aposta firme pola calidade de vida da veciñanza”.

Tamén destaca que se continuará “traballando para dignificar cada recuncho do noso concello, mellorando servizos e creando espazos máis agradables para vivir”.