O Riós estrea un festival de intercambio musical e cultural

O concello do Riós prepárase para vivir unha novidosa xornada cultural coa celebración da primeira edición do Riós Fest International Vibes 2026. Este evento terá lugar o vindeiro sábado 29 de agosto, a partir das 16,30 horas, no recinto da piscina municipal, ofrecendo unha proposta de lecer con entrada gratuíta e dirixida a tódolos públicos.

A iniciativa, impulsada pola asociación cultural A Trisca coa colaboración do goberno local, nace coa vocación de converterse nun espazo de encontro entre pobos a través da música tradicional e de banda. O festival expón un marcado carácter de intercambio cultural entre Galicia e Portugal, unindo as dúas beiras da Raia mediante as actuacións de diversas formacións musicais.

O cartel desta primeira edición está formado por cinco agrupacións que encherán de ritmo a tarde do sábado. Os asistentes poderán desfrutar do talento do Rancho de Chaves e da Banda de Música de Vila Boa de Quires, que achegarán a representación lusa ao evento. A eles sumaranse a Banda de Gaitas de Flariz, a Banda de Música de Ervededo e a propia Banda de Gaitas do Riós.

Dende a organización sinalan que o obxectivo da cita, que nace “con moita ilusión”, é compartir e descubrir novas melodías nun ambiente festivo.