Os alumnos da UNED achegáronse á Lagoa de Antela, en Sandiás

O Centro de Interpretación da Lagoa de Antela, en Sandiás, acolle a vinte alumnos do curso de Restauración de Sistemas da Universidade Nacional de Educación a Distancia (UNED), para darlles a coñecer procesos e exemplificacións de destrución e restauración dos ecosistemas na conca do Limia.

O curso trata aspectos como a degradación ambiental, a relevancia do medio natural e da paisaxe, a lexislación vixente aplicable e como abordar proxectos de restauración. Durante o programa, os alumnos realizan visitas e traballos de campo para o estudo de casos de restauración de ecosistemas, sendo a Limia a sexta.

Coa asesoría da Sociedade Galega de Historia Natural, os alumnos visitaron varios casos na Lagoa de Antela e nas Areeiras de Sandiás. Tamén aprenderon dos diferentes proxectos que se levan a cabo na Limia como o In-visiblePollut, desenvolvido por Amigas das Cegoñas con Ecoembes, Ecoloxistas en Acción, Libera, SEO BirdLife e o Departamento de Química Analítica da Facultade de Farmacia da Universidade de Santiago de Compostela.