A costura ten futuro entre a veciñanza de Sandiás

OFICIOS TRADICIONAIS

A Sala de Exposicións da Casa Consistorial de Sandiás acolleu a preto de 60 veciños e veciñas da contorna -e de toda a comarca limiá- durante a inauguración da II Exposición de Costura, realizada polo obradoiro deste oficio que organiza o Concello.

Algunhas das asistentes desfrutando da exposición. | LR

Esta exposición recolle os resultados do traballo realizado durante 6 meses polo grupo formado por 24 persoas, un compendio de pezas froito da creación colectiva.

O evento estivo presentado pola concelleira Pilar Cabrera, que agradeceu o traballo e a creatividade do grupo e de Geni Losada -a animadora do obradoiro-, entregándolle en nome do Concello un agasallo: un colgante da fábrica de Sargadelos. A representante do grupo do obradoiro, Andrea, fíxolle entrega tamén dun ramo de flores a Geni polo seu traballo “feito con xenerosidade”.

Os asistentes remataron a xornada cun faladoiro sobre a exposición e compartindo petiscos no local social do Concello.

Esta segunda edición quixo facer un recoñecemento aos labregos e labregas das aldeas do Concello polo que a mostra ademais recolle obxectos das tarefas agrícolas, como o xugo das vacas, manestrillas de castiñeiro, tegas, marmeladas, agrades ou garrafóns, entre outras cousas que “recordan ás tarefas de outrora”. A exposición estará dispoñible para visitar con guía ata o 12 de novembro, os mércores e sábados, dende as 19,00 ata as 20,00 horas.