Contos de maxia para cativos na biblioteca da Pobra de Trives

O vindeiro venres 22 ás 12 da mañá, no edificio Santa Leonor, a Biblioteca Pública Municipal da Pobra de Trives acolle o evento “Contamaxias” a cargo do mago Paco.

Os cativos de tres anos en adiante gozarán de 50 minutos de maxia divertida co mago presentando un espectáculo de contos e historias a través de xogos e maxia. O Mago Paco pretende a través desta proposta, traballar os contos para os máis pequenos, demostrando que a risa é o elemento principal para sorprender ao público.

Esta actividade está incluída no programa ‘Ler Conta Moito’, un programa de dinamización da lectura nas bibliotecas públicas promovido pola Xunta de Galicia en colaboración coas entidades locais. Deste xeito, as bibliotecas integradas na Rede de Bibliotecas Públicas de Galicia ofrecen actividades achegando a lectura aos máis novos dunha maneira lúdica.