Trives acolle a concentración de motos este mes de xullo

Trives prepárase para vivir unha fin de semana chea de motor, música e festa coa celebración da vixésima edición da súa Concentración Mototurística. O evento, organizado polo Moto Club Os Esquíos de Trives, desenvolverase os días 11, 12 e 13 de xullo, e reunirá a afeccionados das dúas rodas chegados de diferentes puntos.

A programación comeza o venres 11, coa apertura de inscricións ás 17:00 horas. Pola noite, a partir das 21:00, celebrarase unha chorizada e festa da sangría, seguida da actuación musical da banda América de Vigo na rúa San Martín a partir das 23:30 horas.

O sábado 12 será o día grande. Haberá toro mecánico e inchables durante toda a xornada. Ás 11:00 arrancará a ruta turístico-gastronómica, con paradas para pinchos. Ao regreso, terá lugar unha ruta barítima e o tradicional porco ó espeto, que estará amenizado polo grupo local Macizas Centrais. Pola noite será a gran churrascada, seguida da ruta de bengalas e unha nova actuación musical cos Malditos Pendejos.

O domingo 13, tras o almorzo nos bares de Trives, haberá unha nova ruta mototurística ás 10:30 horas, que incluirá parada con pinchada para os inscritos. Ás 13:30 horas terá lugar a comida, entrega de premios e despedida do evento.

Durante toda a concentración haberá zonas de acampada cuberta e ao aire libre, con servizos e duchas dispoñibles para participantes. O prezo da inscrición é de 50 euros e as prazas son limitadas. Este evento conta coa colaboración de diversos establecementos locais e institucións.