O CIM de Verín organiza un novidoso encontro sobre feminismo xitano

INICIATIVA PIONEIRA

O Centro de Información á Muller (CIM) da Mancomunidade presenta unha iniciativa o 30 de maio que xuntará a mulleres da comarca de Verín en torno ao feminismo xitano ou romaní

A Casa da Cultura verinense albergará o vindeiro 30 de maio, de 10,00 a 14,00 horas, o “I Encontro de mulleres xitanas pola defensa dos dereitos das mulleres e nenas da comarca de Verín”.

Esta xornada, organizada polo Centro de Información á Muller (CIM) da Mancomunidade, ten por obxectivo fomentar a convivencia, apoderamento e aprendizaxe coletiva entre mulleres xitanas e paias do municipio. Dende o CIM fan un chamamente a tódalas mulleres, sexan ou non de etnia xitana, a inscribirse e participar.

A mañá arrancará da man de Rosario Rodríguez, concelleira dos Servizos Sociais verinenses, tralo que tomará a palabra persoal do CIM para presentar o programa, que se dividirá en tres grandes bloques: historia do pobo xitano con perspectiva de xénero, antixitanismo, prexuízos e racismo, e feminismo romaní.

Esta última parte estará conducida por dúas mulleres referentes na loita contra a violencia da “Asociación Gitanas Feministas por la Diversidad”.

Para inscribirse, basta con acceder ao formulario nas redes sociais ou na web do CIM, ou na oficina da traballadora social do Concello de Verín.

Pacto contra a violencia

Este encontro está subvencionado polo Pacto de Estado Contra a Violencia de Xénero dos concellos de Verín, Monterrei, Oimbra, Laza, Castrelo do Val, Vilardevós e Cualedro.