A Deputación salienta as mulleres rurais de Femuro como forza feminina

A Área de Igualdade da Deputación continúa co programa “8M, mes a mes”, e adícalle outubro ás mulleres rurais, personificadas na Federación Provincial de Mulleres Rurais de Ourense (Femuro), con sede en Verín. A deputada de Igualdade, Teresa Barge, explicou que son un claro exemplo de forza feminina dende o rural “e o 15 de outubro é o Día da Muller Rural”.

Maribel Garrido, quen preside Femuro dende 2012, cofundou a federación no 1998 con Corona Meixeira, e agora con 68 asociacións federadas por toda a provincia. A Deputación pon en valor o seu incansable labor a prol do asociacionismo das mulleres no rural, que se reflicte en actos como o que terá lugar en Vilardevós o día 18.

Femuro naceu da necesidade de crear un espazo de unión e colaboración entre as asociacións de mulleres do rural. Segundo a súa presidenta, “traballamos para fortalecer o tecido asociativo feminino e mellorar as condicións de vida das mulleres nas zonas rurais de Ourense”.

A federación traballa dous eixes: o asociacionismo e o ámbito social. Por unha banda, acompaña ás asociacións de mulleres na súa creación e consolidación, ofrecendo asesoramento, apoio en xestións e trámites, dinamización de actividades e organización de talleres, encontros e xornadas formativas.

No plano social, Femuro desenvolve programas de emprego, formación, emerxencia social, conciliación e atención ás mulleres vulnerables. Ademais, leva a cabo sensibilizacións en igualdade para a poboación, tamén nos centros educativos, onde traballa coa infancia e a adolescencia para previr violencias machistas e fomentar relacións dende o respecto e a igualdade.

“Rede no rural”

“Femuro é un nexo entre mulleres de distintas idades, procedencias e realidades, un espazo onde atopan apoio, orientación e acompañamento. É sinónimo de rede, forza e comunidade no rural ourensán”, salienta Garrido.