O distrito forestal XV de Verín, un referente contra os lumes

Os deputados autonómicos do PP Miguel Ángel Viso, Cristina Campero e Víctor Baladrón visitaron a sede do distrito forestal XIV, ubicado no concello de Verín, para comprobar o operativo de prevención e loita contra os incendios forestais de Galicia, no que unha das súas referencias é este distrito no que traballan directamente máis de 200 persoas.

As instalacións teñen preto de 2.500 metros cadrados nas que se instalou unha base da unidade operativa na que o persoal do servizo de prevención e extinción de incendios pode conciliar o traballo co descanso.

A primeira planta a acolle a sede e o centro de coordinación, dende se xestiona a loita contra os incendios forestais a través dun sistema de vixilancia forestal, mentres que a outra é utilizada polo persoal da base da unidade operativa, con zona de vestiarios, aseos, sala de formación, almacén e zona de ocio, ademais dun espazo suficiente para gardar os vehículos todoterreo e as motobombas.

A sede do distrito forestal XIV de Verín, conta este ano con 19 cámaras de vixilancia ao estar considerado todo o distrito como zona de alto risco de incendios, ao tempo que se continúa desenvolvendo unha ferramenta para controlar os riscos e os lumes transfronteirizos, no marco dunha colaboración establecida con Portugal.

7.000 persoas en toda Galicia

O dispositivo de loita contra os lumes forestais en Galicia está integrado este ano por máis de 7.000 persoas, contabilizando tanto os profesionais propios da Xunta como os adscritos a outras administracións, unha trintena de medios aéreos contra o lume, entre os da Xunta e os que achega o Goberno, e 380 motobombas e vehículos pesados, da Xunta e municipais.