O festival Extruga de Verín convida a emular o histórico descenso polo río Támega

O festival de música e cultura urbana Extruga, que terá lugar os días 17 e 18 deste mes en Verín, inclúe na súa programación a recreación da baixada polo río Támega, celebrada durante 15 anos ata o 2008. A organización busca que sexa unha actividade lúdica, cun respecto absoluto polo medio natural, garantindo a seguridade con puntos de reagrupamento e a obriga de seguir as indicacións do persoal ao longo do percorrido.

As embarcacións deben estar feitas con materiais brandos ou inchables, quedando prohibido o uso de sistemas de propulsión mecánica ou motor. Os deseños construídos con poliestireno expandido deben ir totalmente protexidos e a decoración non pode levar pinturas tóxicas nin purpurina que poida desprenderse. Antes de entrar á auga realizaranse verificacións e ademais entregarase unha bolsa de lixo para que o río quede impecable.

Inscricións

Os interesados pódense inscribir ata o 10 de xullo enviando un correao a descensodotamega@extruga.com. O prezo por embarcación e un participante é de 15 euros; cada mariñeiro a maiores deberá aboar 10 euros. O rexistro outorga dereito a unha camiseta conmemorativa, o acceso a unha sesión vermú e optar a premios segundo a orixinalidade do deseño.