O instituto Castro de Baronceli de Verín homenaxea o músico e escritor Miro Mateo cun espazo co seu nome

O instituto Castro de Baronceli celebrou este luns a XVII edición da súa xa tradicional “Romaría das Letras Galegas”, unha iniciativa didáctica e lúdica que busca dinamizar o centro nun día lectivo arredor da visibilización da lingua.

Alén diso, cada ano réndese unha homenaxe a un persoeiro da comarca recoñecido polo seu labor a prol do idioma, e dedícaselle unha aula ou sala.

O homenaxeado este ano foi o escritor, director de corais, mestre e acordeonista Edelmiro “Mirito” Mateo (Verín, 1963), que dá agora nome á cafetería. Mateo estivo acompañado pola súa muller, Modesta Rúa; seu irmán, o adegueiro José Luis Mateo; o exalcalde e subdelegado do Goberno, Emilio González, e o director dos Salesianos de Ourense, Eusebio Martínez.

Benita Pérez, directora do centro, presentou a Mateo e a súa obra ante o alumnado, e destacou a súa ligazón co instituto dende 2012, ano en que a sala de música pasou a levar o nome do seu benquerido amigo Ángel Barja.

Mateo, visiblemente emocionado, agradeceu o cariño de tódolos presentes, e pediulle aos rapaces que aproveitasen o seu tempo no centro porque, a diferenza del, “tedes a sorte de non ter que emigrar para adquirir coñecementos”.

A xornada tivo xantar, xogos populares e unha gala literaria e musical organizada polo alumnado de 4º da ESO, na que tocaron os estudantes e tamén Miro Mateo.