Verín desfruta esta fin de semana de máis de 20 tipos de cervexa

EVENTO GRATUÍTO

A V Festa da Cervexa de Verín arrancou o venres na zona verde da Preguiza e este sábado continúa con máis comida, bebida e música

Grupos de amigos xuntáronse coa cervexa como excusa. | C.M.

Un ano máis, os amantes da cervexa deron este venres a benvida a unha cita xa tradicional no calendario de eventos de Verín, a Festa da Cervexa, que arrancou a quinta edición na zona verde da Preguiza.

Baixo unha gran carpa, veciños e visitantes puideron desfrutar ata pasada a madrugada desta primeira xornada de máis dunha vintena de cervexas nacionais e de importación.

O ambiente na Preguiza foi moi animado. | C.M.

As bebidas con lúpulo, trigo e cebada maridáronse con diferentes propostas gastronómicas, grazas aos 12 postos (10 interiores e dous exteriores) habilitados.

A velada viviu o seu momento cumio á medianoite, durante a actuación de Tresillos, un trío picheleiro que ofreceu as súas versións de temas de power pop-rock.

O recinto volverá abrir este sábado á tarde por segundo e último día, de 18,00 a 02,00 horas. Haberá música de novo ás 00,00 horas, desta vez da man da agrupación ourensá En Mala Hora Rock & Roll Band.