Germán García-Ávila: “Queremos ver con que fondos contamos para humanizar Viana canto antes”

García-Ávila, que relevou ao popular Andrés Montesinos como alcalde de Viana do Bolo, ostentará o bastón de mando ata o vindeiro 18 de agosto de 2026.

Nesa data, segundo o pacto de goberno asinado cos nacionalistas, a alcaldía pasará a mans do BNG, e Graciela Diéguez converterase na primeira alcaldesa da vila.

Pregunta. Moitos veciños seguramente se preguntan: por que agora?

Respuesta. Eu tamén mo pregunto, por que permitimos gobernar ao PP. En Viana aconteceron cousas que todo o mundo sabe, e que xeraron un ambiente enrarecido entre o BNG e PSOE, de falta de confianza. Ao fin aparcamos todo iso, non podíamos fallar aos que votaron por nós e por forzas progresistas. A vila está nunha situación caótica, temos miles de motivos para facelo.

P. Que Concello se atopará tras case catro anos de goberno popular?

R. A xestión administrativa é de pena. O SAF leva tres anos sen licitarse, non o fixo o PP nin cando tivo maioría absoluta. As subvencións ás escolas deportivas, culturais, Entroido, folións, etc. están sen pagar dende 2023. O alcalde, co que había unha falta total de diálogo, escudábase en que facía falta un novo orzamento, cando o único que precisaba era habilitar achegas, como fixeron moitos outros concellos como Verín ou O Barco.

P. Que medidas quere levar a cabo neste ano do que dispón?

R. Primeiro temos que aterrar e ver os fondos. O orzamento está aprobado, pero non sabemos de que achegas podemos dispor. Temos moitas propostas, como humanizar a vila, que presume dunha paisaxe única e privilexiada, pero cunha circulación e limpeza que non están á altura. E buscaremos a colaboración de tódalas administracións.

P. Prefería gobernar en coalición?

R. Sería o ideal, pero foi unha das condicións do BNG. Apoiarémonos en todo, pero sen coaligarnos.