A Xunta celebra as xornadas do grelo galego en Xinzo

Innovación e tradición

As xornadas formativas dividiranse en sesións teóricas os venres pola tarde e prácticas os sábados pola mañá

A Consellería do Medio Rural vén de anunciar que organizará catro accións formativas sobre o cultivo de grelo en Galicia: “As xornadas Grelo galego, un cultivo con futuro”. Estas sesións serán impartidas por expertos en enxeñería agrónoma e veterinaria, afondando na tradición, a innovación e o territorio.

As xornadas formativas, que comezarán este fin de semana no Mercado Agrario Comarcal Mesón do Vento de Ordes, na Coruña, chegarán a Xinzo os días 21 e 22 de novembro.

Durante as sesións, farase unha introdución á Indicación Xeográfica Protexida Grelos de Galicia, prestando especial atención nos requisitos de certificación e as vantaxes que supón adherirse á marca. Impartiranse tamén técnicas modernas de produción de grelo, así como nocións básicas de manexo integrado para poder identificar pragas e enfermidades que afectan á planta.

No eido do procesado, a calidade e a comercialización, a acción formativa afonda nos criterios de conservación e lavado dos grelos. Por último, impartirase unha sesión sobre a recolección mecanizada deste vexetal.

As accións formativas están divididas en dúas sesións: as clases dos venres, en horario de tarde, serán teóricas; mentres que as dos sábados, en horario de mañá, consistirán nunha demostración práctica de campo.

As persoas interesadas en inscribirse nesta acción poderán facelo no enderezo direccion.agacal@xunta.gal ou no número de teléfono 881 996 280.