“Entre formas e palabras” achega a danza a Espadanedo

O Concello de Xunqueira de Espadanedo acollerá o vindeiro sábado 2 de agosto o terceiro encontro do ciclo de conversas “Entre formas e palabras”, incluído no marco do Festival Danza no Claustro e promovido pola Fundación Paideia Galiza e a Xunta de Galicia, a través da Axencia Galega de Industrias Culturais.

Esta iniciativa xira arredor do sector da danza. Estes encontros, que combinan relatorios con actuacións ao vivo, celébranse desde o pasado mes de maio en diferentes localidades galegas.

O encontro, que é de balde, terá lugar no salón de plenos do Concello, ás 11,30 horas, e centrarase na importancia das redes de colaboración no ámbito da danza contemporánea e contará coa participación de Maruxa Salas e Erik Jiménez, coreógrafos e intérpretes da compañía SóLODOS, e impulsores de proxectos referenciais como os festivais SóLODOS en Danza (Ourense e Costa Rica), Danza no Claustro e Danza no Camiño.

Estarán acompañados por Natividad Buil, directora do Festival Trayectos, un espazo pioneiro de danza contemporánea en contextos urbanos. O showcase desta edición correrá a cargo de Clara Ferrao Diz, bailarina, creadora e docente especializada en danza contemporánea.

A conversa estará conducida pola bailarina, coreógrafa e xestora cultural Paula Quintas.