Os veciños de Maceda viviron a última hora da tarde de onte o acontecemento máis esperado do seu ciclo de Entroido. “A baixada da Marela” é un acontecemento que vaise consolidando como unha das citas principais que non deben perderse no Entroido da provincia.
A tradición, o espectáculo e a emoción mestúranse neste ritual coas risas e o bo ambiente, e son moitos os que tratan de esquivar a arremetida da vaca de madeira que manexan os veteranos deste Entroido. Hai máis dunha década, a Asociación Felos das 12 parroquias coñeceu a existencia de dúas vacas de madeira nos pobos de Pías e Baldrei, en Maceda, e decidiuse recuperar unha tradición que, xunto aos felos, fai especial e singular este Entroido.
“Pola mañá saíron os felos polas aldeas do concello. Unha celebración para resurxir o rural. As aldeas énchense dunha alegría e felicidade que se reflicte nas caras dos veciños e veciñas. Pola tarde seguiron visitando as aldeas do concello e logo foi a baixada da Marela, unha das celebracións máis importantes que temos no noso concello ao longo do ano. Recibimos á Marela acompañados de carros con fariña e lume”, explicou a alcaldesa de Maceda, Uxía Oviedo.
A celebración de onte contou con centos de visitantes e estivo amenizada polas charangas BCB, Zés Pereiras de Amarante, A Felga e Fuego.
Fotos: José Paz.
