Verín abre as inscricións do desfile de Entroido

O Concello de Verín abriu este xoves o prazo de inscrición para as carrozas e comparsas que queiran participar no desfile de Entroido. A data límite para formalizar a participación será o 10 de febreiro ás 19,00 horas. “A orde de colocación do desfile irá en criterio da organización”, explican dende o ente municipal, recordando que “os que non se inscriban e aparezan o día do desfile colocaranse ao final do desfile”.

Así, como todos os anos, o desfile sairá da avenida de Castela o Domingo de Entroido ás 12,00 horas e o Martes de Entroido ás 16,30 horas. Para o correcto desenvolvemento do traxecto, dende a organización recomendan “non realizar longas paradas, que as carrozas leven seguro propio e que os vehículos modificados que leven un extintor”.

Como é habitual, a organización do Entroido celebra o Domingo de Piñata -26 de febreiro- cos participantes do desfile. “Poderán participar na tradicional comida que se realiza ese día unicamente os participantes que se inscriban previamente para o desfile”, sinalan.

Os interesados en participar poderán inscribirse na oficina de información turística de Verín, a través do correo electrónico turismo@verin.gal ou no teléfono 988 41 16 14.