V Concurso de Fotografía Matemática

Ben sabido é que as matemáticas son, ou eran, ese óso tan duro de roer que a moitas persoas se lles atragantaron durante anos. “Si, si, dos logaritmos xa me falaran meus pais”, oín máis dunha vez na aula. Sen embargo as “mates” están de moda. Gustan. Ó menos é o que penso cando observo varios frontais de parede do noso instituto cheos de instantáneas tomadas por rapaces e rapazas do centro. Moitas, e de moi boa calidade: encadres, títulos acertadísimos, composicións xeométricas, ángulos imposibles... E o certo é que a fotografía matemática é un importantísimo punto de unión entre as matemáticas e a vida cotiá, non só por ser unha actividade entretida que se pode practicar en grupo e ó aire libre, senón tamén porque nos anima e ensina a meditar sobre o que reflectimos nas propias instantáneas.

Por todo isto, dende o Departamento de Matemáticas do IES Carlos Casares de Viana do Bolo (Ourense) queremos felicitar a todos os participantes neste xa “V Concurso de Fotografía Matemática”, e especialmente a Lois González e a Nuria Álvarez, que obtiveron, respectivamente, o primeiro e segundo premio polos traballos “Os rectángulos e os círculos valen máis do que pensabamos” e “Simetría vianesa”. A todos, grazas.