A Festa da Istoria de Ribadavia e o CD Arenteiro reciben os Premios Insua dos Poetas, nas modalidades de Iniciativa Cultural e na de Colectivo ou Institución Destacada do Carballiño, respectivamente. O xurado reuniuse onte pola tarde para fallar un total de sete galardóns, que se completan coa Creación Artística para o fotógrafo Xulio Gil; a Literaria concedido o premio á escritora Concha Blanco; pola Defensa do Medio Natural, o recoñecemento é para a Fundación Eira; en Cultura Galega e Emigración para a familia Fragoso-Pegito de Buenos Aires e na modalidade de Acción Social para a Federación Down Galicia.
A Fundación Insua dos Poetas fará entrega dos galardóns durante o acto de celebración da XV Festa da Palabra, que terá lugar este sábado no paraxe natural e escultórico da Esgueva (Madarnás). Os premiados recibirán unha peza escultórica orixinal do artista ourensán Acisclo Manzano.
Programa
A xornada na Insua dos Poetas estará dedicada a cultura e lingua galega, xa que ademais da entrega dos premios, tamén se rendirá unha homenaxe ao profesor e escritor Arcadio López Casanova.
Con tal motivo, o editor César Lorenzo Gil e o director xeral de Cultura, Anxo Lorenzo, encargaranse da presentación do libro “Antoloxía esencial de Arcadio López Casanova” (1965-2019), preparada por Luís González Tosar, escritor e presidente da Fundación Insua dos Poetas. Trátase do primeiro volume da Colección Valilongo, editada pola fundación.
Continuando coa tradición de engrosar a mostra de artes plásticas nesta paraxe, Antón Pulido presentará a maqueta da vidreira “Kermesse” dedicada ó homenaxeado e que se instalará na insua en setembro, unha obra moi complexa de 4 por 2 metros.
Ademáis, o acto tamén contará con actuacións musicais a cargo de Aurum Ensemble e de Airiños de Candelas. Unha vez rematado a parte cultural, os asistentes compartirán un xantar de irmandade na ourensanía.
Confirmaron a súa presenza o presidente da Deputación, Luís Menor; o conselleiro de Cultura, Román Rodríguez e o presidente do Parlamento, Miguel Santalices.
A Insua dos Poetas conta coa colaboración da Xunta de Galicia e da Deputación de Ourense, ademais das empresas Coren, Estrella Galicia e Viña Costeira.
