O CIFP Vilamarín terá mil metros cadrados máis coa ampliación

A Xunta de Galicia vén de licitar as obras que permitirán a ampliación do CIFP de Vilamarín e nas que se investirán arredor de 823.000 euros. Trátase dunha superficie ampliada de 955 metros cadrados que se prevén construír en seis mesas, ao abeiro do Plan de Nova Arquitectura Pedagóxica.

O delegado territorial da Xunta, Gabriel Alén, xustificou esta actuación no CIFP de Vilamarín na falta de espazo no módulo de Talleres-Cociñas, máis concretamente na zona dedicada a Pastelería. Así o dixo na visita ao centro acompañado do alcalde, Amador Vázquez.

A actuación consiste en realizar un novo volume encostado á edificación actual, pola súa banda norte, facendo unha planta de soto destinada a vestiarios e limpeza, unha planta baixa onde se localizan as novas aulas-talleres e unha planta baixo cuberta dedicada a almacenaxe de material e utensilios de cociña.