De craks e individualidades

Nun diario deportivo da prensa madrileña, observamos a foto a páxina completa de dúas das estrelas do Real Madrid de fútbol, Mbappé e Bellingham, no posterior ao partido co Valencia. Noutra foto interior vemos ao mesmo Mbappé recollendo o premio á Bota de Ouro como máximo goleador das ligas europeas na tempada pasada.

Dende calquera óptica, e moito máis se nos referimos a deportiva, non semella ser o máis xusto e correcto destacar exclusivamente o labor goleador dun xogador cando o fútbol é deporte de equipo polo que son imprescindibles os compañeiros que xogan e o asisten na súa faceta goleadora. Sería máis lóxico que nesa foto apareceran todos os seus compañeiros.

Por outra banda, destácase con sobresaliente o partido dos dous xogadores citados e tamén do defensa ferrolán Carreras, quen ademais marcou un gol extraordinario, o primeiro dun xogador español do Real Madrid nesta tempada. Pero a súa actuación apenas mereceu unhas liñas na crónica do partido.

Enxalzar a xogadores top e publicar noticias sobre todo dirixidas a súa honra, é o máis doado e “vende” moito. Pero con frecuencia non responde á xusta realidade.

Manolo Romasanta Touza

(Sigüeiro)