Xa está aquí a nova onda?

Estamos nunha situación realmente preocupante. O motivo salta á vista: mentres vemos como unha vez máis se reactivan os contaxios do coronavirus, os políticos seguen botando balóns fóra, coma se a cousa non fóra con eles. Cada comunidade ten que xestionar as normas que considere oportunas, pero o que decidan terán que preguntar aos xuíces de quenda se avalan as mesmas, se din si ou non.

Isto está a crear un verdadeiro problema. Estamos a ver de novo o que sucedeu desde que o Goberno de España decidiu que as autonomías xestionasen o tema. Por exemplo, en Galicia si se aprobou o de esixir o certificado covid en visitas a hospitais e no lecer nocturno; é iso ou ter que pechar, caso de que isto siga disparándose, como está a suceder.

O problema é que o Goberno de coalición non se quere mollar, cando en realidade debería facelo. Pero claro, se toman medidas desde Madrid, toda a oposición, incluídos ás veces os mesmos socios de investidura, estarán á espreita para dicir non a todo, ás veces aínda que sexa algo lóxico, o único que importa é desgastar ao Goberno.