O xefe do Servizo de bombeiros de Ourense

O pasado 19 de xuño cumpriu 65 anos o aparellador xefe do Servizo de bombeiros de Ourense. Dende facía meses tiña solicitado ampliar a súa vida activa ata os 70 anos, e diferentes responsables políticos municipais, parece ser, que lle tiñan dito que non lle vían dificultade; mesmo o señor alcalde.

Pero, foron pasando os días, as semanas e mesmo os meses sen resposta formal. Esta chegou o día xusto do seu cumpreanos ó parque de bomberios de Ourense, arredor do mediodía, coma nos vellos tempos, con motorista: O seu cese. Tres días antes xa lle notificaran a súa baixa á Seguridade Social, mentres el atendía o seu posto e as súas responsabilidades.

Gobernar é algo máis ca ditar resolucións, xustas ou non. Gobernar é algo distinto de mandar. Gobernar non é ter poder. É ter autoridade e exercela dando a cara, non escondéndose detrás dos informes.

A xubilación de quen durante 40 anos foi responsable dunha parte moi importante da seguridade de todos os ourensáns non pode ser un acto de covardía política. Debe ser un acto nobre e solemne.

Dende estas páxinas, e na miña calidade de cidadán de Ourense e de ex responsable da area de seguridade do Concello de Ourense, gracias amigo Aurelio polos 40 anos de servizo ós ourensáns.

Contenido patrocinado