Esposende contará en sete meses coa igrexa reformada

A Consellería de Cultura, Lingua e Xuventude adxudicou as obras de rehabilitación da igrexa de Santa Mariña de Esposende, ben pertencente ao Catálogo do Patrimonio Cultural de Galicia por tratarse dunha edificación románica dos séculos XII e XIII con incorporacións na nave dunha capela gótica do século XVI e unha sacristía.

O delegado territorial da Xunta en Ourense, Manuel Pardo, visitou a igrexa acompañado pola alcaldesa de Cenlle, Rebeca Sotelo, anunciando unha inversión nestas obras de 168.000 euros, cun prazo máximo de execución de sete meses.

O delegado territorial explicou que con esta actuación preténdese a mellora das condicións de humidade interior do coro da igrexa e nos interiores da fachada norte da nave e da capela gótica, que danan as pinturas murais existentes que na actualidade se ocultan tralas sucesivas capas de encalado.

Os traballos consistirán na revisión dos encontros de chumbo existentes; limpeza da cuberta e dos paramentos exteriores de cantaría; na restauración dos elementos escultóricos e das melenas das campás; na substitución da fiestra; na ocultación do oco de saída á cuberta; na eliminación de elementos metálicos e na execución da drenaxe na fachada norte.n