Últimas prazas en Femuro para o seu programa "Concilia 2022"

A Federación de Mulleres Rurais de Ourense (Femuro) está a ultimar os preparativos para iniciar o 1 de setembro o seu programa “Femuro Concilia 2022”, cuxo obxectivo é facilitar a conciliación familiar e laboral das familias da comarca. “Sabemos que as cargas familiares, o emprego e a formación fan difícil a conciliación. Para paliar estas necesidades decidimos comezar este novo programa en setembro”, explican as traballadoras en Verín.

“Femuro Concilia” está destinado a familias con nenos de entre 2 e 12 anos e desenvolverase en horario de tarde, de luns a venres, de 15,30 a 20,30 horas. Iso si, en períodos vacacionais o horario trocarase a mañá.

Este programa prolongarase durante o resto do ano 2022, “e pretendemos a súa continuidade tras o 31 de decembro”, engaden dende Femuro. Os interesados en sumarse a esta iniciativa familiar teñen esta semana para inscribirse, pois as prazas son limitadas.

Mercado solidario

Ademais, Femuro acolle esta semana o seu mercadiño solidario, localizado nun baixo da avenida de Sousas. Estará aberto ao público en horario de 09,30 a 14,30 horas ata o 26 de agosto.

O obxectivo desta iniciativa é recadar fondos para os seus programas sociais e, paralelamente, darlle unha segunda vida a obxectos que estaban en desuso. Poden atoparse libros, obxectos de decoración, bixutería e xoguetes, entre outros.