Castro Caldelas prepara xa a tradicional Festa dos Fachós

O vindeiro 19 de xaneiro, domingo, Castro Caldelas será escenario dunha das súas tradicións máis senlleiras: a Festa dos Fachós, unha celebración que mestura devoción, folclore e comunidade. A partir das 19:15 horas, entre o lusco e fusco, dará comezo a procesión encabezada por unha figura de San Sebastián feita de palla, e o Gran Fachón de máis de 30 metros, seguidos dos máis de 500 fachós individuais que o Concello poñerá a disposición dos participantes.

A comitiva percorrerá o casco histórico da vila, rodeando o castelo e culminando no santuario dos Remedios, onde os restos dos fachós se depositarán nunha gran fogueira. Ao redor desta, os asistentes bailarán gozando dunha noite chea de tradición. Os chourizos asados e o viño tampouco faltan nesta celebración.

A Festa dos Fachós non só reúne aos veciños e veciñas, senón que atrae visitantes que desexan experimentar a maxia desta procesión, que combina o lume, a música tradicional e a forza dos veciños que manteñen vivo o espírito dunha tradición centenaria.