Ordiá! No 12 de Outubro tamén fan un Carrabouxo para os maios

Ao Carrabouxo sóbranlle admiradores. Os voluntarios da asociación xuvenil Amencer están elaborando un maio artístico do mítico persoeiro que lle canta as corenta a máis de un nas viñetas diarias de La Región. É prácticamente do mesmo tamaño da escultura que loce no San Lázaro. Pois saíulles competencia. O alumnado do IES 12 de Outubro, un dos centros máis participativos na festa da benvida a primavera, tamén se fixa no carismático Carrabouxo. Iso si, cun maio máis moderno: neste non hai musgo nin elementos naturais, hai recortes dos debuxos que o humorista Xosé Lois González publica neste xornal dende hai 40 anos.

“Facémolo tódolos anos, é moi guai e divertido o momento de elaborar os maios e as coplas cos profesores”, conta Sofía, de 2º da ESO, nun descanso do intenso traballo no que participa toda a clase. Fan outro maio a maiores para saír a rúa o próximo domingo, este máis enxebre, cuberto de musgo.

“Tódolos anos participamos. Este é o meu segundo, porque o ano pasado cheguei ao instituto. Temos sacos de patacas, logo poñemos o musgo e decoramos con xestas e carrabouxos”, explica Lúa, outra alumna, mentres as compañeiras lle dan o relevo colocando as xestas no outro maio. A clase de galego non está na aula: está no patio grazas aos maios que fomentan a creatividade da rapazada. Confírmao a profesora, Chus: “Esta festa significa a non perda, o fomento dunha tradición popular e un factor de identidade que debe pervivir nos rapaces”. Nunca ten problema para atopar voluntarios: a mellor proba é que non cabe nin un rapaz máis no recuncho no que están elaborando os maios.

Aprendendo a rimar

Tómanse tan en serio esta tradición que levan máis dun mes preparando coplas, o outro sinal de identidade da Festa dos Maios. Son rimas cantadas polos nenos que, normalmente, critican a actualidade da cidade. “Son críticas aos políticos, por exemplo”, adiantan os estudantes. Facelas na clase de galego estimula a súa creatividade: “Aprendemos a rimar”.