Tres rutas percorrerán os platós de cine ourensáns

Como cada ano dende 2019, o Ourense Film Festival (OUFF) incluirá na súa programación varios roteiros para coñecer os principais escenarios de cine da provincia. No 30 aniversario do festival -que terá lugar entre o 26 de setembro e o 5 de outubro- haberá tres rutas, cada unha delas trazada por tres localidades distintas:

• Luns, 29 de setembro: visitaranse os escenarios de películas rodadas en Ourense, como “Los girasoles ciegos”, “Amigos hasta la muerte”, “A Esmorga”, “13 exorcismos”, “Cuñados”, “+ Cuñados”, “O home e o can”, “Hospital Central”, “Pelerinaxes” e “Años después”, con posterior parada para o xantar. A visita continuará en Pazos de Arenteiro, onde poderemos coñecer os principais escenarios de “Elisa y Marcela”, e en Moldes, onde se visitarán o sitios percorridos en “A Esmorga” e “Elisa y Marcela”.
• Mércores, 1 de outubro: o mosteiro de San Pedro de Rocas, no concello de Esgos, acolle a visita do escenario de “Live is life”, continuando posteriormente a viaxe en Allariz, onde se coñecerán, antes dun pequeno descanso para o xantar, os lugares que acolleron as gravacións de “A lingua das bolboretas”, “Cuñados” e “La virgen de cristal”. A xornada finalizará en Celanova percorrendo os sitios polos que pasearon “Elisa y Marcela” ou que apareceron en “Años después”, “El desorden que dejas” ou “El bosque del lobo”.
• Venres, 3 de outubro: o día comezará no mosteiro de San Clodio e a ponte medieval de San Clodio, en Leiro, visitando os espazos nos que se rodaron filmes como “Los girasoles ciegos” e “Cuñados”. A ruta continuará no Museo do Viño de Galicia, en Santo André de Camporredondo, onde se realizará unha visita ó espazo de rodaxe do corto “Fillas do Ribeiro” e ós viñedos da zona. En Ribadavia farase un descanso para xantar, retomando posteriormente o roteiro na vila para coñecer os escenarios de “A Esmorga”, no barrio xudeu, de “Cotolay”, na Taberna da Papuxa, “El desorden que dejas”, na igrexa de San Antón, e “Olvido y León”, no paseo do río Avia. A última parada terá lugar en Melón, visitando o mosteiro de Santa María, onde se gravaron escenas de “Cotolay”, e en Meón “Las brujas de E ́ lente”.

Os participantes desplazaránse en autobús ata as distintas localidades. Así, cada día o punto de encontro será ás 09,30 horas, na exposición do OUFF que ahberá no Centro Cultural Marcos Valcárcel, e a saída da ruta realizarase ás 10,00 horas dende a Alameda. Percoranse os principais rincóns de cine que serviron como set para un gran número de películas que se rodaron na provincia ao longo do tempo, cunha parada para xantar e regresar a Ourense arredor das 17,00 horas.

A inscrición para calquera destas rutas pode facerse a través do correo electrónico roteirosdecine@gmail.com ou nos teléfonos 690 813 726/988 215 465.