Obituario | A nosa Ana da tienda

Hai uns meses que lle fixemos unha homenaxe a Ana na que con estas palabras lle agradeciamos a súa dedicación ó noso querido Boazo e ás súas xentes:

Contigo tivemos a tendeira máis traballadora, servicial, alegre e guapa da contorna.

Contigo todo estaba solucionado: ninguén se quedaba sen pan, os nenos sempre tiñan lambonadas e ós maiores nunca lles faltaba a compra ó pé da porta.

Igual atendías ó negocio, ás fillas, á cociña, á horta, ás vacas dos veciños,... que facías de enfermeira. Todo estaba ó teu alcance.

As túas mans sempre dispostas a axudar.

Nas festas contigo tiñamos todo organizado (incluso chegaches a multiplicar o pan e os chourizos), e sobre todo, a alegría e a festa estaban garantidas.

A pesar de non naceres en Boazo, fuches e serás sempre o noso temón.

Hoxe as circunstancias xa non son as mesmas. Déixasnos despois duns meses de loita contra esta dura enfermidade, acompañada do cariño e coidado da túa xente, en especial das túas fillas, que se adicaron a ti, co mesmo respecto, amor e comprensión que ti as criaches.

A túa falta en Boazo deixa un gran baleiro... Ti eras a “dona” das chaves de moitas casas, ti recollías as nosas cartas, coidabas a igrexa, o centro social, os nosos maiores,... E coa chegada do wsap, estabamos informados en tempo real, se maduraban os tomates, se florecían as flores do noso xardín ou se o pobo amañecía nevado.

Ti sempre tiñas tempo para todos cun sorriso e as portas da túa casa e do teu corazón sempre estaban abertas.

Recordo que cando nos despediamos de ti dicías: Ata sempre queridos, coidádevos, que Dios nos de salud, que todo queda aquí.

Ti marchas pero aquí queda nos nosos corazóns unha pegada imborrable da túa alegría, da túa paciencia e da túa bondade infinita ata o último momento.

Que a nosa Virxe da Asunción te arroupe co seu manto para mitigar a dor desta última etapa da túa vida e, alí onde chegues, sexas de novo ese ser marabilloso, sorrinte e alegre. Que esa voz semelle o canto dun gorrión e voes de novo feliz como unha bolboreta.

Gracias Ana, infinitas, por estes anos marabillosos que compartinos contigo, fuches o maior tesouro que tivemos neste querido Boazo, sempre nos fixeches moi felices.